कार्यक्रमका अध्यक्ष महोदय,
उद्योगी व्यवसायी मित्रहरु,
उपस्थित दिदी बहिनी तथा दाजूभाईहरु,
पत्रकार मित्रहरु ।
निजी क्षेत्रको सवै भन्दा पुरानो प्रतिनिधिमूलक संस्था नेपाल चेम्वर अफ कमर्सको ६६ औं वार्षिक साधारण सभा तथा चेम्बर दिवस कार्यक्रममा सहभागी हुन पाउँदा मलाई खुसी लागेको छ । यस महत्वपूर्ण अवसरमा नेपाल चेम्बर अफ कमर्सको साधारण सभाको पूर्ण सफलताको शुभकामना व्यक्त गर्दछु ।
निजी क्षेत्रको सवैभन्दा पुरानो र प्रतिनिधिमूलक संस्था नेपाल चेम्वर अफ कमर्सले आफ्नो स्थापनाको ६६ वर्ष देखिनै निजी क्षेत्रको सुझाव तथा मागलाइ सरकार समक्ष प्रस्तुत गर्दै निजी क्षेत्र र सरकार वीच सम्पर्क सूत्र अथवा सेतुको काम गर्दै आएको व्यहोरासंग म जानकार छु । यसका साथै चेम्बरले नेपाल सरकारले लागू गर्ने उद्योग व्यापार तथा वित्तसंग सम्वन्धित नीतिगत बिषयमा नेपाल सरकारलाई सुझावहरु प्रदान गरी सरकारको थिङ्क ट्याङ्कको रुपमा भूमिका निर्वाह गर्दै आएको छ । चेम्वरले अन्तर्राष्ट्रिय चेम्वरहरुसँग समन्वय तथा सम्पर्क गरेर आर्थिक कूटनीतिमार्फत् मुलुकको अन्तराष्ट्रिय व्यापार प्रवद्र्धनमा समेत भूमिका निर्वाह गरेकोमा म चेम्बरलाई धन्यवाद दिन चाहन्छु ।
सरकारले निजी क्षेत्रको मागलाई मध्यनजर राख्दै औद्योगिक व्यवसाय ऐन, विशेष आर्थिक क्षेत्र सम्बन्धी कानून पारित गरेको ््््््तथा रुग्ण उद्योगलाई पुनस्र्थापना गर्ने कार्यलाई अगाडी वढाइएको छ । नेपालको औद्योगिक विकास र तिब्रताका दिशामा यसले महत्वपूर्ण नीतिगत योगदान गर्न सक्छ भन्ने मेरो गहिरो विश्वास रहेको छ । नीजि क्षेत्रसँगको साझेदारी र सहकार्यमा राष्ट्रिय अर्थतन्त्रको विकास गर्ने सरकारको संकल्पमा यसले दूरगामी भूमिका खेल्ने नै छ ।
केही दिन अघि मात्र वित्तीय क्षेत्रको सुदृढीकरण गर्न वाफिया सम्वन्धी ऐन पारित भई सकेको छ । संक्रमणकालीन राजनीतिक अवस्थामा निजी क्षेत्रको भूमिकालाई थप प्रभावकारी बनाउन र दिगो आर्थिक विकासको लक्ष्य हासिल गर्ने उक्त ऐनले महत्वपूर्ण भूमिका खेल्नेछ भन्ने मेरो विश्वास छ ।
यसका साथै उद्योग व्यवसायको प्रवद्र्धन र सर्वसाधारणको सुविधा सन्दर्भमा विद्युत बितरण प्रणालीलाई सुदृढ गर्दै लोडसेडिङ क्रमशः अन्त्य गर्दै लगिएको छ । औद्योगिक विकासका लागि अत्यावश्यक रहेको विद्युत आपूर्तिका लागि सरकारले विद्युत चुहावटलाईनियन्त्रण गर्ने र नयाँ तथा ठूला जलासययुक्त विद्युत आयोजनाहरुको सञ्चालन गर्ने सरकारको नीति रहेको छ । लोडसेडिङको अन्त्य गर्दै हाल सञ्चालनमा रहेका उद्योगहरुमा नियमित विद्युत आपूर्ति र नयाँ उद्योगहरुका लागि विद्युत बिस्तार गर्न सरकार गम्भीर छ । विद्युत चुहावटको सवाल सरकारको मात्रै चासो र चिन्ताको विषय नभएर नेपालको अर्थतन्त्रको सवलीकरणको सन्दर्भमा सबैभन्दा महत्वपूर्ण पूर्वाधार भएकाले लोडसेडिङ अन्त्यको सरकारी प्रयासमा निजी क्षेत्रको सहयोग र सद्भावको अपेक्षा गरेका छौं । यस दिशामा नेपाल चेम्बर अफ कमर्सको विगत समयमाझैं सकारात्मक सहयोग रहने विश्वास लिएको छु ।
हामीले आर्थिक एजेण्डालाई सुरुदेखि नै महत्व दिदै आएको सन्दर्भमा विचाराधिन रहेका विधेयकलाई शिघ्र पारित गर्न पहल गर्ने छौं । राजनीति नै सबै नीतिको मियो हो । राजनीतिले सही दिशा र गति हासिल ग¥यो भने मात्रै त्यसले समग्र देशको विकास र समृद्धिमा सकारात्मक योगदान दिन सक्छ । तर, दिन दिनैका राजनीतिक विवाद, बिमति र गतिविधिहरुमा अल्झिएर विकासका कामलाई तपसिलमा राख्नु हुँदैन भन्ने मेरो प्रष्ट मत छ । मेरो नेतृत्वमा नयाँ सरकार गठन भएपश्चात् राष्ट्रिय गौरवका आयोजनाहरुको निरन्तर अनुगमन गरिरहेको छु । अनुगमनका क्रममा मैले समयभन्दा अगावै कम लागतमा गुणस्तरीय काम गर्ने आयोजना प्रमूख र कर्मचारीहरुलाई पुरस्कृत गर्ने र राष्ट्रिय संकल्पका लागि अभिप्रेरित गर्ने घोषणा गरिसकेको छु । यसले मात्रै राष्ट्रको आर्थिक समृद्धि र विकासका निम्ति राज्यका संयन्त्रहरुलाई ठिक ढंगले परिचालन गर्न सकिने यथार्थता म स्मरण गराउन चाहन्छु ।
चेम्वर जस्ता निजी क्षेत्रका प्रतिनिधिमूलक संस्थाका सुझावलाई हामी उच्च मूल्यांकन गर्दै सरकारले तर्जुमा गर्ने नीति सकेसम्म समावेश गर्ने सरकारको नीति रहेको छ । सरकार र निजी क्षेत्रको साझेदारी र सहकार्यमा मात्रै राष्ट्रको विकासले गुणात्मक प्रगति गर्न सक्छ भन्नेमा सरकार स्पष्ट छ । नीजि क्षेत्रका सकारात्मक चासो र चिन्तालाई सम्बोधन गर्दै लगानीको वातावरण बनाउने र नीतिगत सवालमा सरकारले सहजीकरण गर्नु आवश्यक छ । यसमा सरकार सधैं सकारात्मक सहयोग र सहकार्यका लागि तत्पर छ ।
आर्थिक क्षेत्रसँग सम्बन्धि विषयहरुमा नीतिगत निर्णय लिँदा निजी क्षेत्रको प्रतिनिधित्व र भावनालाई सम्बोधन गर्न सरकार सकारात्मक छ । आर्थिक क्षेत्र एवं विकास र समृद्धिसँग सम्बन्धित विषयमा निजी क्षेत्रको प्रतिनिधित्व बढाउन, नीतिगत निर्णयपूर्व निजी क्षेत्रको राय र सुझावका आधारमा निर्णय गर्ने व्यवस्था गर्न र त्यसको संरचनागत व्यवस्थाका बारेमा आवश्यक निर्णय गर्न सरकार गम्भीर छ ।
सरहकार निर्यातलाई निजी क्षेत्रको माग बमोजिम प्रोत्साहन गर्न र निर्यात प्रवद्र्धनको लागि निजी क्षेत्रसंग सहकार्य गरी अघि बढ्न प्रतिवद्ध छ । यसका लागि आर्थिक कूटनीतिको विस्तार आजको आवश्यकता भएको सन्र्भमा सरकारले यस दिशामा निरन्तर प्रयत्न गर्दै आएको छ । दुई छिमेकी लगायत विश्व समुदायसँग निर्यात प्रवद्र्धनका लागि सरकारले प्रयत्न गरिरहेको छ । उत्तर दक्षिण नाका बिस्तार लगायतका क्षेत्रमा सरकारले गरेको प्रयत्न यसै उद्धेश्यमा परिलक्षित भएको विषय पनि म स्मरण गराउन चाहन्छु ।
अन्त्यमा, संवेदनशील राजनीतिक परिस्थितिमा सरकार र निजी क्षेत्रको सहकार्यमा राष्ट्रिय चुनौतिहरुको सामना गर्ने र चुनौतिलाई अवसरमा वदल्न यहाँहरुको सकारात्मक सद्भाव र सहयोगको अपेक्षा गर्दै नेपाल चेम्बर अफ कमर्सको ६६ औं साधारण सभा र चेम्वर दिवसको पूर्ण सफलताको शुभकामना व्यक्त गर्दछु, धन्यवाद ।